പളളിയില്‍ പച്ചകുത്തിക്കൊടുക്കും!

മിഷിഗണിലെ ഒരു പളളിയില്‍ ടാറ്റൂ സെന്റര്‍ തുടങ്ങി. ഇക്കാലത്ത്‌ വിശ്വാസികളെ ആരാധനാലയത്തില്‍ എത്തിക്കണമെങ്കില്‍ ഇത്തരം പൊടിക്കൈകള്‍ സ്വീകരിക്കണമെന്നാണ്‌ വികാരി സ്‌റ്റീവ്‌ ബെന്റ്‌ലി പറയുന്നത്‌. എന്നാല്‍, വികാരിയുടെ ചിന്താഗതിക്ക്‌ വിശ്വാസികളുടെ സമൂഹത്തില്‍ നിന്ന്‌ കടുത്ത എതിര്‍പ്പും നേരിടേണ്ടി വരുന്നുണ്ട്‌. ഫ്‌ളിന്റ്‌ ടൗണ്‍ഷിപ്പിലെ ഒരു ഷോപ്പിംഗ്‌ മാളിലാണ്‌ വാര്‍ത്തകളില്‍ സ്‌ഥാനം പിടിച്ച ബ്രിഡ്‌ജ് പളളിയുടെ സ്‌ഥാനം. പളളിയോട്‌ ചേര്‍ന്ന്‌ 'സെറിനിറ്റി ടാറ്റൂ' എന്ന പേരിലാണ്‌ പച്ചകുത്ത്‌ കേന്ദ്രം പ്രവര്‍ത്തിക്കുന്നത്‌. ആളുകള്‍ പരമ്പതാഗതമായ ആരാധനാ സ്‌ഥലങ്ങളില്‍ വരുന്നതിന്‌ മടികാണിക്കുന്നു. ഇത്തരത്തില്‍ മതത്തിന്റെ പ്രാധാന്യം കുറഞ്ഞുവരുന്നതിനെ മറികടക്കുന്നതിനാണ്‌ വേറിട്ട ചിന്ത പ്രാവര്‍ത്തികമാക്കുന്നതെന്ന്‌ ബെന്റ്‌ലി പറയുന്നു. ഞായറാഴ്‌ച ഒഴികെ എല്ലാ ദിവസങ്ങളിലും ഉച്ചയ്‌ക്ക് 12 മുതല്‍ രാത്രി എട്ട്‌ വരെ പളളിയിലെ ടാറ്റൂ സെന്റര്‍ തുറന്ന്‌ പ്രവര്‍ത്തിക്കും. തന്റെ ആശയം വിജയിച്ചു എന്നും വിശ്വാസികളെ ആകര്‍ഷിക്കുന്നതിന്‌ തനിക്ക്‌ സാധിച്ചു എന്നും സ്‌റ്റീവ്‌ ബെന്റ്‌ലി അവകാശപ്പെടുന്നു. ഇതുകൊണ്ട്‌ മാത്രം ബെന്റ്‌ലി അവസാനിപ്പിക്കുന്നില്ല. ഇനി രണ്ട്‌ റസ്ലിംഗ്‌ മത്സരങ്ങള്‍ കൂടി നടത്തുന്നതിനാണ്‌ ബെന്റ്‌ലിയുടെ തീരുമാനം.